A intervención sitúase nunha parcela con vistas ao mar e comprende o deseño da vivenda principal, dos elementos auxiliares e da urbanización da propia parcela.
A relación entre os distintos volumes e os desniveis do terreo convértese nun factor clave do proxecto. Para resolver estas diferenzas de cota, establécese unha serie de plataformas executadas en pedra de cachotaría sobre as que se apoian os diferentes volumes que conforman o conxunto.
O acceso á edificación prodúcese tanto peonil como rodado desde a rúa paralela aos volumes. A vivenda procura privacidade pechándose cara á rúa e abríndose ao patio arredor do cal se organiza, aproveitando as vistas, a orientación e o soleamento da parcela.
O edificio destinado á vivenda componse de planta semisoto e planta baixa, articulándose mediante volumes que configuran unha planta en L arredor dun patio.
Na planta baixa dispóñense dous volumes principais nos que se diferencian claramente a zona de día e a zona de noite, mentres que o semisoto alberga o garaxe e os espazos de almacenamento.
O volume destinado á zona de día inclúe o salón, o comedor e a cociña, ademais dunha despensa, cuarto de limpeza e aseo.
O outro volume destínase aos distintos dormitorios da vivenda cos seus correspondentes baños, así como a unha zona de estudo. Xunto a esta sitúase a escaleira que comunica coa planta semisoto.
A edificación organízase arredor dun patio delimitado polo volume dos dormitorios, a zona de salón-comedor e unha serie de terrazas exteriores xunto coa piscina, situadas na marxe suroeste da parcela.
O acceso desde a rúa prodúcese aproximadamente no punto de unión entre o volume dos dormitorios e o das zonas de día, dando paso a un vestíbulo distribuidor. Desde este organízanse os principais espazos de salón-comedor-cociña, así como os ámbitos de baño, despacho, almacenamento, garaxe e instalacións.
A vivenda péchase cara ao sueste para garantir a privacidade e ábrese cara ao noroeste para aproveitar as vistas ao mar. Na zona suroeste sitúanse unha terraza e unha piscina exterior, dispostas para aproveitar ao máximo a luz natural e o soleamento.
