O pasado 28 de xullo tivo lugar a entrega de chaves das 74 vivendas de promoción pública de Valdecorvos, en Pontevedra, realizadas para o Instituto Galego da Vivenda e Solo (IGVS). A actuación, formada por catro edificios e 74 vivendas, supón un investimento global superior aos 17,8 millóns de euros, dos cales 3,7 millóns proceden de fondos europeos.
O acto contou coa presenza do presidente da Xunta de Galicia, Alfonso Rueda, acompañado pola conselleira de Vivenda e Planificación de Infraestruturas, María Martínez Allegue; o delegado da Xunta en Pontevedra, Pablo Fernández; e outros representantes institucionais. Antes da entrega de chaves, visitaron unha das vivendas.
Con esta entrega conclúe o proceso de construción dunha promoción concibida para crear un contorno residencial de calidade, integrado na paisaxe e orientado á sustentabilidade. Os catro edificios dispóñense xerando espazos libres de relación entre eles, mentres que as vivendas incorporan xardíns privados ou amplas terrazas, buscando unha relación directa entre os espazos interiores e exteriores.
